Сайдын ээлжит шуурхай хуралдаан /2024.05.27/-ны өдөр боллоо. Шуурхай хуралдааны эхэнд яамны газар, хэлтэс, харьяа байгууллагууд, төслийн нэгжүүдийн удирдлагууд өнгөрсөн хугацаанд хийж хэрэгжүүлсэн ажил, үүрэг даалгаварын биелэлт, тулгамдаж буй асуудлууд, яаралтай шийдвэрлэх шаардлагатай асуудлуудаа танилцууллаа.
Барилга, хот байгуулалтын сайдын өмнөх шуурхай хуралдаанаас өгөгдсөн үүрэг даалгаварыг холбогдох газар хэлтсүүд, төслийн нэгжүүд, харьяа байгууллагууд 90 хувьтай биелүүлж, хэрэгжилтийг ханган ажилласан байна.
Ирэх 14 хоногт яаралтай шийдвэрлэж, хэрэгжилтийг хангах ажлуудын хүрээнд Барилга, хот байгуулалтын сайд Ц.Даваасүрэн дараах үүрэг чиглэлийг өглөө. Үүнд:
Барилга байгууламжийн норм нормативын сангийн үйл ажиллагааны 2024 оны төлөвллөгөөг яаралтай батлуулах;
Польш Улсын хөрөнгөөр аймгуудын цэвэрлэх байгууламжийг шинээр барих төслийн хүрээнд хийгдэж буй Дорнод аймгийн цэвэрлэх байгууламжийн гэрээг дүгнэж, шийдвэрлэх.
“Солонго 1, 2” орон сууцны хорооллын төслийн барилгын ажлыг төлөвлөсөн хуваарийн дагуу явуулж, орц гарцыг хааж газар олгосон асуудлыг хууль хяналтын байгууллагаар шийдвэрлүүлэх;
Шинэ төв цэвэрлэх байгууламжийн барилгын ажлыг хугацаа хоцроохгүй явуулж, тус байгууламжид ажиллах боловсон хүчнүүдийг сургаж дадлагажуулах;
5002 айлын “Солонго 1, 2” орон сууцны хороолол барих төслийн барилгын ажлыг эрчимжүүлж, тус хорооллын орц, гарцыг хааж газар олгосон асуудлыг хууль хяналтын байгууллагад хүргүүлж шийдвэрлүүлэх;
Ус бохирдуулагч аж ахуй нэгж байгууллага, үйлдвэрүүдийн урьдчилан цэвэрлэх байгууламжид тавих хяналтыг эрчимжүүлж, технологийн зааварчилгаа, зөвлөмж өгч ажиллах.
